لميس بالفيصلية ..!!! - مملكة حليمه بولند الرسمية, منتديات حليمه بولند, صور حليمه بولند,

نزف المشاعر . . } ~ · 28-07-2008

............................

اللي دعاني لكتابة هالموضوع هو منظر شفته أمس في فيصليتنا الحبيبة مصيف أهل الرياض

ياما شفنا فيها من تقليعات وحركات هبال ويا ما حنشوف .. تفأجأت حبتين بالمنظر لأني

كنت أحسب حمى المسلسلات التركية طفت شوي بس شكل الفراغ عامل عمايله في شبابنا

ما لكم بالطويلة ..

كنت طالع الفيصلية أمس وأنا طالع عالدرج قالت لي أختي : لف وراك شف ذالمتخلفين وش مسويين

حاولت ما أبين إني أطالع ولفيت وجهي وشفت شابين سعوديين في عمر الزهور ( أمحق زهور )

واحد لابس ثوب والثاني تي شيرت والكشرة ماليه وجيههم وملامحهم تقطر فخر وشموخ

طبعا ما دريتوا ليه الفخر والشموخ ؟ أنا أقولكم

كانوا المماليح طابعين صورة لميس حقت سنوات الضياع (الممثلة التركية ) على صدورهم

ورازين خششهم في كل مكان مبسوطين على لفت الإنتباه والتعليقات والهمهمة والتهزيئات اللي

تجيهم من هذا وذاك وين ما راحوا ( على بالهم مسوين حركة ) لا ويقول واحد منهم تعال نروح

لصالة المطاعم ماشافونا هناك ؟؟؟؟؟ الحمد لله والشكر يا مثبت العقول بس !

يعني صح لميس حلوة وكذا بس من هي لميس ووش سوت عشان تنرز صورتها بهالطريقة على

صدور رجال مشوربين وكل واحد كبر الجدار.. تصدقون ما ذكرت إلا المثل اللي يقول

( أجسام البغال وعقول العصافير ) مع احترامي للبغال !

المهم لحقهم ولد أختي الصغير وصورهم .. صح ان الشباب عليهم طلعات بس منظرهم سخييف وتافه

لهالدرجة وصل فينا الإنحطاط الفكري ولا عاد يشغلنا غير لميس ومهند وربعهم !!!

/
\
/

الله لايفشلنا ..

اترك التعليق لكم ..

\
/

منقول ..