ليما الحين وانتي حلوة ودلوعة؟
- ما قدر اقول جذي بس ماراح اسمح لنفسي اكون عجوز شمطاء ومثل ما يتمنون لي العذال.
ليش ابتعدتي عن الاعلام؟
- يا ريال: انا عمري فوق الستين وما فيني شدة مثل قبل وما عندي شيء جديد يسوى اقدمه والحين انا متفرغة ومجابلة احفادي اللي اقضي وياهم احلى ايام عمري.
وشلون تقضين يومك يا حليمة؟
- ايام ما كنت شابة كنت اقوم القايلة لاني كنت اسهر مع رايلي نطالع الشوتايم والحين انام مبكر الساعة 9 مساءً يعني تقدر تقول رديت لايام الطفولة فالشيخوخة مثل الطفولة صحتي تعبت مو مثل قبل، واقوم بالاشراف على اعمال البيت واقعد مع بناتي واولادي واحفادي.
ليش ابتعدتي عن الاضواء؟
- لاني وصلت لمرحلة اكتفاء وتشبع ذات من حياة الشهرة والاضواء والنجومية وانا مؤمنة ان لكل زمان دولة ورجال ووقت ما كنت بالاعلام كنت مكتسحة الجميع، لكن الحين تركت المجال لبنات في عمر احفادي.
وللحين تشوفين اعمالك العتيجة يا حليمة؟
- ساعات اشوفها مع احفادي واقول لهم شوفوني وانا صغيرة شكتر كنت حلوة لانهم مو مصدقين اني كنت جميلة عشان اهم ما يشفون الا التجاعيد في وجهي.
حسن الخاتمة
وين أصدقائك؟
- الله يرحمهم كلهم ماتوا وانا الحين اقول يا الله حسن الخاتمة.
وشخبار «كشختج» اللي كنت مشهورة فيها ايام ما كنتي تلبسين ماركات عالمية؟
- فيه بنت من حفيداتي اسمها سارة تشبهني وايد اتسأنس لما اشوفها تهتم بأناقتها لما تلبس ماركات ولما اعطيها لبسي القديم تتطنز عليَّ وتقولي هذي موضة قديمة يا ماما عودة وانا افكر اعرض هالملابس في مزاد علني.
تذكرين ايام لما سويتي دعاية للعدسات والعطور والسيارات شنو الدعاية اللي ممكن تسوينها الحين؟
- ممكن اسوي دعاية نظارات طبية او اسوى دعاية ملافع.
ليش ما فكرتي تسويين عملية تجميل؟
- ماسويتها وانا صغيرة تبيني أسويها بعد هالعمر مع اني احتاجها الحين اكثر من قبل.
هيفاء وروبي
من تحبين تسمعين من المطربات؟
- ما اقول الا الله يرحم ايام الست هيفاء وهبي وخالدة الذكر روبي ايام الفن الاصيل اما مطربات هالايام استحي اطالعهن ومعاي حفيداتي هيفاء وروبي كانتا تقدمان إغراء راق بس مطربات هالايام اغرائهاتهن فاضحة وهابطة وما يستحون على ويوههمن.
للحين تاكلين برد ولا طاحت ضروسج؟
- ضروسي طاحت ونسيت طعم البرد من زمان وكل شي اكله يهرسولي اياه.
قالوا انك راح تمثلين بالسينما وين ما شوفنا شيء؟
- امبلي قدمت سلسلة افلام حليمة منها حليمة والوحش وحليمة والعين الحارة وهالفيلم حقق ايرادات كسرت الدنيا وفاز في مهرجان كان بالجائزة الذهبية وقدمت بعد فيلم حليمة في سوق السمك ومن يومها مافي سمكة في البحر ما تعرفني ولا تنسى اني قدمت فوازير واذكر اني كنت اول واحدة تسوى فوازير بالخليج وصارت موضة.
شنو الامنية اللي ما حققتيها للحين وتتمنين تحقيقها؟
- من زمان كنت اتمنى اصير ام وتأخرت وايد لحين الله كتب وصرت ام وعندي احفاد وحفيدتي سارة راح تتزوج هاليومين وبخاطري انها تشتغل مذيعة لان اشوف نفسي فيها.
والحين شخبار رشاقتك اللي كنتي مشهورة فيها؟
- وايه يا ريال ذاك زمان مضى الحين. الحين وبهالعمر تبيني العب ايروبكس مثل قبل!
تاريخ النشر 04/09/2008
جريده الوطن : حليمه بولندقررت بيع ملابسها في مزاد علني
